Vampýrella

“Vampýrella” er triðja verkætlanin hjá Aldubáruni í samstarvi við Edward Fuglø og tónaskaldið Páll Sólstein. Søgan lýsir gentuna Ellu, sum er í ferð við at broytast frá barni til tannáring. Um teir báðar beiggjarnar Karl og Knút, sum eru farnir at ivast í, um systirin Ella er sum onnur, ella um hon er ein vampýrur. Beiggjarnir fylgja við í hesi ørkymlandi broytingini hjá Ellu, sum fær teir at ógvast við.

Við dreymakendum myndum og tónleiki verða børnini drigin inn í søguna og uppliva broytingarnar, sum henda í einum systkinaflokki og í egnum sinni. Framførslan gevur teimum innlit í menniskjaliga menning – umframt eina livandi listarliga uppliving.

Aldubáran er føroyskur kamartónleikabólkur, virkin á fleiri tónleikapallum. Umframt at spæla nýggjan føroyskt skrivaðan tónleik, pallverk og klassiskan tónleik annars, hevur Aldubáran eisini tikið stig til og framført fleiri nýskrivað verk ætlað børnum. Millum annað tey tvey verkini “Janus er ein stjørna” og “Poetikus” við støði í bókum, sum Edwardi Fuglø hevur skrivað og myndprýtt, og Páll Sólstein gjørt tónleik til.